Javohir Zokirov

Javohir Zokirov
Javohir Zokirov (2018-yil)
Tavalludi	Javohir Jamshidovich Zokirov 9-noyabr 1972-yil (1972-11-09) (53 yosh) Toshkent, Oʻzbekiston SSR
Fuqaroligi	Oʻzbekiston
Kasbi	aktyor, rejissyor, musiqachi
Janr	drama, melodrama, komediya
Faoliyat yillari	1986—hozirgacha
Otasi	Jamshid Zokirov
Onasi	Gavhar Zokirova
Turmush oʻrtogʻi	Shahrizod Gʻulomova
Bolalari	3 nafar
Qarindoshlari	bobosi — Karim Zokirov buvisi — Shoista Saidova amakilari — Farrux Zokirov, Botir Zokirov

Javohir Jamshidovich Zokirov (1972-yil 9-noyabr, Toshkent, Oʻzbekiston SSR, SSSR) — oʻzbekistonlik taniqli aktyor, rejissyor va xonanda. Zokirovlar sulolasi vakili. Mashhur oʻzbek pop-rok guruhi „Bolalar“ning asoschilaridan biri. 2022-yilgi izlanishlarga koʻra, Oʻzbekistondagi eng qimmat gonorar oluvchi aktyor (kuniga 500 AQSh dollari). Ilk professional rolini „Tsarapina“ filmida ijro etgan. „Sotqin“, „Baron“, „Avloniy“ kabi filmlar, „Mendirman Jaloliddin“ serialidagi rollari bilan omma orasida shuhrat qozongan.

Javohir Zokirov 1972-yilning 9-noyabr sanasida Toshkent shahrida, Zokirovlar sulolasi aʼzolari — O‘zbekistonda xizmat ko‘rsatgan artist Jamshid Zokirov va Oʻzbekiston xalq artisti Gavhar Zokirovalar xonadonida tugʻilgan. Oilada toʻngʻich farzand. Bezori bola boʻlgani uchun maktabdan haydalgan. Bolalar guruhi asoschilardan hisoblangan Bahodir Po‘latov va Tohir Sodiqov bilan doʻst boʻlgan. Keyinchalik, uchalasi birgalikda guruhga asos solishadi.

Boshlangʻich taʼlimni Olmazor tumanida joylashgan 46-maktabda, soʻngra bolalik uyi yaqinida joylashgan maktabda oʻqigan. 1990—1994-yillarda Moskva davlat kinematografiya institutida tahsil olgan.

BBC nashri bilan intervyuda 1980-yilda suratga olingan Zavtra viydyosh? (oʻzbekcha: Ertaga koʻchaga chiqasanmi?) filmida ilk marotaba koʻrinish berganini taʼkidlagan. Ilk professional rolini „Tsarapina“ filmida ijro etgan. Bolalar guruhining 1989-yili yozilgan eng birinchi — guruhning „Esingdami seni?“ nomli eng mashhur musiqalaridan biri joy olgan — albomi chiqarilgandan soʻng, Javohir Zokirov guruhni tark etib, Rossiyaga oʻqishga joʻnab ketadi.

Aktyor 1996-yildan beri muntazam ravishda katta ekranlarda koʻrinish berib kelmoqda. Keyinchalik, „Katta urushdagi kichik odam“ (1989-yil; Shuhrat Abbosov filmi), „To‘ylar muborak 2“, „Bo Ba Bu“ (1998-yil; Ali Hamroyev filmi), „Voiz“ (1998-yil; Yusuf Roziqov filmi), „Tohir va Zuhra“, „Buyuk Amir Temur“ (1996-yil), „Ko‘rgulik“ va yana bir qator filmlarda bir necha rollar ijro etgan. Qozog‘iston kinoijodkorlari bilan hamkorlikda ishlagan. TV Markaz xususiy kanali uchun avtorlik dasturlari tayyorlash bilan shugʻullangan. BBCning „Sog‘lig‘ingiz o‘z qo‘lingizda“ loyihasi uchun musiqalar yozgan.

Taniqli oʻzbek adibi Gʻofur Gʻulomning qizi Shahrizod Gʻulom (Gʻulomova) bilan turmush qurgan. Uch nafar — ikki oʻgʻil va bir qiz farzandi bor. Zokirov Jahongir Otajonovning musiqalarini sevib tinglaydi.

• Bobosi — Karim Zokirov, sovet qoʻshiqchisi, Zokirovlar sulolasining asoschisi;
• Buvisi — Shoista Saidova (1920—2000), xonanda, xalq qoʻshiqlari ijrochisi.
• Otasi — Jamshid Zokirov (1948—2012), sovet va oʻzbek teatr va kino aktyori, Oʻzbekistonda xizmat koʻrsatgan artist.
• Onasi — Oʻzbekiston xalq artisti Gavhar Zokirova;
• Amakisi — O‘zbekiston SSR xalq artisti Botir Zokirov;
• Amakisi — Yalla vokal-instrumental ansambli rahbari Farrux Zokirov;
• Singlisi — sanʼatshunos Ohista Zokirova
• Qarindosh opasi — Nargiz Zokirova.

• Javohir Zokirov IMDbda
• Rizanovadagi profili
• Javohir Zokirov Instagramda